• dle 10.2
  • ,
  • наши фильмы
  • Регистрация    Войти
    Авторизация
    » » » ГумэкIыгъохэр шъхьэихыгъэу ГумэкIыгъохэр шъхьэихыгъэу

    ГумэкIыгъохэр шъхьэихыгъэу ГумэкIыгъохэр шъхьэихыгъэу

    Категория: Новости / Экономика

    Адыгеим щыпсэухэрэм АР-м и ЛIышъхьэ занкIэу зызыфагъазэм Iофыгъоу къаIэтыгъэхэм язэхэфын КъумпIыл Мурат ыуж ит. Ащ къыдыхэлъытагъэу Мыекъопэ ыкIи Теуцожь районхэм тыгъуасэ ащыIагъ, гумэкIыгъоу цIыфхэр зэуалIэхэрэм атегущыIагъэх.


    Пстэуми апэу псэупIэу Табачнэм гурыт еджапIэу дэтыр республикэм и ЛIышъхьэ къыплъыхьагъ. Ар 1961-рэ илъэсым ашIыгъагъ. Джырэ уахътэ мыщ кIэлэеджэкIо 262-рэ щеджэ, спортым зызщыфагъэсэщт зал хэтэп. Гурыт еджэпIакIэм ишIын Iофыгъо шъхьаIэу къызэрэуцурэр нафэ афэхъугъ. Мыщ гъэцэкIэжьынхэр щэкIох, ау аужырэ шапхъэхэм адиштэу гъэпсыгъэным пэчыжь.

    Урамхэр къызэрагъэнэфыхэ­рэм зэрэрымыразэхэр, лъэсгъо­гухэр зэрямыIэхэр, псэупIэхэу Табачнэмрэ Краснооктябрьскэмрэ зэрипхэу асфальт гъогу ашIынэу зэрэфаехэр республи­кэм и ЛIышъхьэ шъхьэихыгъэу къыфаIотагъ. Адыгеим псэолъэ­шIы­нымкIэ, транспортымкIэ, псэ­упIэ-коммунальнэ ыкIи гъогу хъызмэтымкIэ иминистрэу Валерий Картамышевым къэзэрэугъоигъэхэр зэрэщигъэгъозагъэ­хэмкIэ, мыгъэ урамхэр къагъэ­нэфыным ыкIи лъэсгъогухэр ашIыным япхыгъэ Iофыгъохэр зэшIуахыщтых. Джащ фэдэу об­щественнэ транспортыр къызщы­уцущт чIыпIи 7 тапэкIэ зэрашIыщтыр зэхахьэм къыщаIуагъ.

    Краснооктябрьскэмрэ Табачнэмрэ азыфагу километритIу хъурэ гъогоу илъым асфальт зытыралъхьэкIэ, «IэпыIэгъу псын­кIэр» Табачнэм нахь псынкIэу нэсы зэрэхъущтыри къыхагъэщыгъ. Ащ изэхэфын зэрифэ­шъуашэу Iоф да­шIэнэу КъумпIыл Мурат къулыкъухэм унашъо афишIыгъ.

    Спортым зызщыфагъэсэщтыр, кIэлэцIыкIухэр зыщыджэгущтхэр псэупIэм дэтынхэм иIофыгъуи зэхахьэм къыщаIэтыгъ. Ахэр зы чIыпIэм щыгъэпсыгъэхэмэ ишIуа­гъэ къэкIонэу зэрилъы­тэ­рэр КъумпIыл Мурат къы­Iуагъ.

    — ДжэгупIэхэр зэготхэу, ахэм чъыгхэр къягъэтIысэкIыгъэхэу, тетIысхьапIэхэр щытхэу, пстэури зэрифэшъуашэу къэ­нэфэу гъэпсыгъэ зыхъукIэ, цIыфхэмкIэ чIыпIэр гуIэтыпIэщт, — къыIуагъ Адыгеим и ЛIышъхьэ. — Мыщ дэжьым мэхьанэшхо зиIэр псэупIэм щыпсэу­хэрэм язэхэшIыкI, ядунэе­еплъыкI ары. Шъузэгъу­сэу, шъузэдеIэжьзэ шIы­хьафхэр зэхашъущэхэу, псэупIэм икъэбзагъэ шъулъып­лъэу, ихэхъоныгъэхэм шъуарыгушхо зыхъукIэ, тызэгъусэу IофшIэнэу зэхэтщагъэм уасэ иIэ хъущт.

    Пхъэ шIомыкI къыдэзыгъэкIырэ цехым хэбзэнчъэу Iоф зэришIэрэм фэгъэхьыгъэу Адыгеим и ЛIышъхьэ Табачнэм щы­псэурэ нэбгыритIумэ зыкъыфагъэзагъ. Мыщ изэшIохын Iоф дашIэнэу КъумпIыл Мурат уна­шъо афишIыгъ.

    КIэлэцIыкIухэм футбол ешIапIэ афэгъэпсыгъэным кIэлэ­еджакIохэр еджапIэм езыщэлIэщт автобус зэрямыIэм, гурыт еджа­пIэм зэрэщагъашхэхэрэм япхыгъэ Iофыгъохэм, ащ медицинэ кабинет зэрэчIэмытым, нэмыкIхэми зэхэсыгъом щатегу­щыIагъэх. «Сбербанкым» ибанкомат псэупIэм къыдагъэуцоным цIыф­хэр къыкIэлъэIугъэх. Джащ фэдэу зекIо кIорэ цIыфхэм апае къушъхьэм зэрэкIощтхэ гъогу тамыгъэхэр нахьыбэу къытырагъэуцонхэу зэхахьэм къекIолIагъэхэр АР-м и ЛIышъхьэ къелъэ­Iугъэх.

    — ГумэкIыгъоу къэшъуIэтыгъэхэм ядэгъэзыжьын тыдэлэжьэщт. Ау псынкIэу зэкIэ зэшIохыгъэ зэрэмыхъущтыр, тIэкIу-тIэкIоу ахэр зэрэдэдгъэ­зыжьыщтыр къыхэзгъэщы сшIоигъу, — къыIуагъ КъумпIыл Мурат. – ЦIыфхэм нахьыбэ къагъэшIэныр, демографием зэхъокIыныгъэшIухэр фэшIыгъэнхэр пшъэрылъ шъхьаIэу зыфэтэгъэуцужьых.

    Фельдшер-мамыку IэзапIэу Табачнэм дэтым изытет нэужым КъумпIыл Мурат зэригъэлъэ­гъугъ. Ащ игъэкIотыгъэ гъэцэкIэ­жьынхэр ешIылIэгъэнхэм зэрэпылъыщтхэр республикэм ипащэ игущыIэ къыщыхигъэщыгъ.

    Адыгэ Республикэм и ЛIышъхьэу КъумпIыл Мурат минист­рэхэм я Кабинет хэтхэр игъу­сэ­хэу нэужым Теуцожь районым ит къуаджэу Пщыкъуй­хьаблэ щыIагъ. ПсэупIэм игупчэ культурэм и УнакIэу щашIырэм дэжь къы­щызэрэугъоигъэ цIыфхэм республикэм ипащэ якIолIагъ, шъхьэихыгъэ зэдэгущыIэгъу адыриIагъ.

    Культурэм ипсэолъакIэ ишIын зынагъэсыгъэм АР-м и ЛIышъхьэ кIэупчIагъ. Ар зэраухыжьыщтым дакIоу, къыпэIулъ чIыпIэри зэтырагъэпсыхьан зэ­рэфаер министрэу Аулъэ Юрэрэ муниципалитетым ипащэу Хьачмамыкъо Азэматрэ ариIуагъ.

    ЦIыфхэм гумэкIыгъо шъхьаIэу къаIэтыгъэр зашъохэрэ псым изытет уигъэрэзэнэу зэрэщымытыр ары. АР-м и ЛIышъхьэ къызэриIуагъэмкIэ, мы гумэкIыгъор 2019-рэ илъэсым дэгъэзыжьыгъэ хъущт, джащ фэдэу лъэсрыкIо гъогухэм яшIын, псэупIэм къэзыгъэнэфырэ пкъы­гъохэр дэгъэуцогъэнхэм яIофыгъуи мыгъэ зэшIуахыщт. Лъэпкъ проектхэм ягъэцэкIэн къыдыхэ­лъытагъэу фельдшер-мамыку IэзапIэм ишIын 2020-рэ илъэсым къуаджэм щырагъэжьэнэу агъэ­нафэ. IэпыIэгъу псынкIэм иIоф­шIэн зэрэзэхищэрэм, диспансеризацием, нэмыкI Iофыгъохэми лъэныкъохэр атегущыIагъэх. Джащ фэдэу псэупIэм дэсхэ кIэлэцIыкIухэр гурыт еджа­­пIэм ещэлIэгъэнхэмкIэ гумэкIыгъохэр къызэрэуцухэрэр къыхагъэщыгъ. БылымхъупIэхэр зэрафимыкъу­хэрэр къэгущыIагъэхэм ащыщ­хэм къа­Iуагъ. Мы Iофыгъо пстэумкIи IэпыIэгъу зэрагъотыщтыр рес­пуб­ликэм ипащэ къариIуагъ.

    — ГумэкIыгъоу шъуиIэхэм защыдгъэгъозэнэу, IэпыIэгъу тыкъышъуфэхъунэу къуаджэм тыкъэкIуагъ. Тэ талъэныкъокIэ къыттефэрэр дгъэцэкIэщт, тишIуагъэ къышъодгъэкIыщт. Ау шъори шъуIэ зэкIэдзагъэу Iоф шъушIэн, чылэм изытет нахьышIу хъуным шъулъып­лъэн фае. ШIыхьафхэр зэха­шъу­щэх, IэпыIэгъу шъукъытфэхъу, — къыIуагъ КъумпIыл Мурат.

    ЩыкIагъэхэу яIэхэр зэрэзэхи­шIагъэхэм, IэпыIэгъу къафэхъу­нэу къызэригъэгугъагъэхэм афэшI АР-м и ЛIышъхьэ зэрэфэразэхэр Пщыкъуйхьаблэ щыпсэухэрэм къа­Iуагъ. Iофыгъохэр зэхэфыгъэхэ зэрэхъурэм КъумпIыл Мурат лъып­лъэщт.

    ГЪОНЭЖЬЫКЪО Сэтэнай.
    ТХЬАРКЪОХЪО Адам.



    Источник: Газета Адыгэ Макъ
    Уважаемый посетитель, Вы зашли на сайт как незарегистрированный пользователь. Мы рекомендуем Вам зарегистрироваться либо зайти на сайт под своим именем.